1. Oray naon anu teu bisauen ngaleor ? oray nu ngalegleg linggis
2. Naon sababna laum tumpak mobil urang sok nundutan ? Sabab banna buleud
3. Makê baju bodas lain dokter, make hêlem lain tentara ? Togê
4. Di luar konêng, di jero bodas,nu apaleun monyêt ? Cau, nu neguh monyêt
5. Tangkalna di gunung, daunna di cai
6. Hayam naon anu sukuna sarêbu
7. Tukang naon lamun digeroan dititah dahar sok naêk ka luhur ?Tukang ngagali sumur
8. Hayam naon anu sukuna hiji
9. Gajah tumpak bêca, gedê naonna ? Bohongna
10. Dipencêt beuteungna, kaluar tina sirahna
11. Awakna digantung, beuteungna ditakolan?  Kohkol
12. Naon anu dicabak aya tapi ari dilieuk teu aya ? Ceuli
13. Dibawa nangtung sarê, dibawa sarê nangtung ? Talapak suku
14. Dicukur buluan teu dicukur dugul ? Buah kadongdong
15. Sato naon anu awakna dina sirah sukuna dina sirah ? Kutu
16. Tukang dagang naon anu nyumput ? Tukang bilik
17. Kapas 2 kg, batu 1 kg, lamun ditinggangkeun kana suku nyeri mana ? Nyeri suku
18. Ku naon tukang baso nakolan mangkok ? Ku sendok
19. Soêh teu bias dikaput, kotor teu bias diseuseuh ? Kertas
20. Budak dugul asup kana leutak ? Cilok
21. Petina hiji mayitna loba ? Korêk api
22. Naon sababna karêta api leumpangna ngarayap ? Mun nangtung nabrak pesawat
23. Bisa turun tapi teu bias naêk ? Hujan
24. Supirna opatan ari panumpangna saurang ? Pasaran anu dipakê ngagotong mayit
25. Buah naon anu tara diala ? Buah murag
26. Gajah keur ulang taun. Sakumna sasatoan geus daratang, iwal ti tititnggi kunaon pangna can datang? Make sapatuna lila
27. Unggal diasupkeun ka luar deui ? Kancing
28. Jalma naon anu sukuna tilu, panonna opat ? Aki-aki make iteuk jeung kaca mata
29. Panjangna sajeungkal, heuras, aya buluan, nu teu make moal bisa seuri ?
30. Indungna nyeuseuh,bapana ngudud, anakna ceurik ? Karêta
31. Nu hiji diasupkeun, nu opat jararogêd ? Ramo nu dipakê ngorong
32. Sumur gantung di awing-awang ? Kalapa
33. Manuk naon anu sirahna dina suku, jangjangna dina suku ? Manuk katincak
34. Ditingal ti hareup tungkul, ditingal ti tukang bongkok, ditingal ti gigir sukuna wungkul ? Tukang bilik
35. Ari diudag lumpat, tapi ari didagoan cicing ? Kalangkang
36. Gunung bitu, bandêra kekelebetan ? Bau hitut
37. Indungna diusapan, anakna ditincakan ? Tarajê
38. Akarna di luhur, pucukna di handap ? Janggot
39. Ari nangkub eusi, ari nangkarak kosong ? Kopêah
40. Manêhna di handap abdi diluhur, manêhna gugurubugan abdi igel-igelan, jalma nu keur naon? Nu keur nguseup
41. Aya balon sapuluh, bitu hiji, kempês tilu, kari sabaraha deui? Kari salapan deui
42. Pribumi di luar, ari sêmah di jero ? Tukang bêca
43. Panonna tilu sukuna genep ? Nu pêcak nungtun domba
44. Hayam naon anu isuk-isuk tara kongkorongok ? Hayam paêh
45. Tipeuting asak, tibeurang atah ? Lampu listrik
46. Maju êlêh mundur meunang ? Kalangkang
47. Panjang hêjo di tengah-tengahna ngebul ? Nu manggul awi bari ngudud
48. Dipeuncit hirup, mun teu dipeuncit paêh ?
49. Piring naon anu bisa dipakê nempo bulan ?
50. Sato naon anu teu bisaeun mundur ?
51. Batu naon anu teu aya di cai ?
52. Nu digandong maju, nu ngagandong cicing ?
53. Oray hêjo panonna loba ? Peuteuy
54. Bangku naon anu bias didahar ? Bangkuang
55. Ditakol nyendol, teu ditakol nyendol ? Goong
56. Budak botak loba kutuan ? Ondê-ondê
57. Titinggi sukuna sarêbu, nincak tai munding, tinggal sabaraha deui sukuna ?
58. Diubek ditêangan, sanggeus kapanggih dipiceun ? Korong
59. Baso dibalikkeun jadi naon? Bahê
60. Disebut sakali jauh, disebut dua kali deukeut ?
61. Sato naon anu awakna leutik pisan, sirahna gedê pisan ?
62. Ti luhur lam ti handap lam, di tengah-tengah kap ? Bantal, kasur
63. Anu unggal dipeuncit nyambung deui ? Cai
64. Kaca naon anu pangbeurat-beuratna ? Kacalikan gajah
65. Kaca naon anu bau? kacapirit
66. Aya manuk10 ditembak hiji, tinggal sabaraha ? Teu ayahiji-hiji acan
67. Naon sababna lambang apotêk gelas dibeulit ku oray ? Lamun dibeulit ku gajah bakal peupeus
68. Sato naon anu pengleutik-leutikna saalam dunya ? Incuna kuman nu teu barangdahar 7 poê
69. Hideung, leutik, bahaya ? Sireum ngarayap dina bom
70. Kumaha carana ngabêdakeun sirah cacing jeung buntut cacing ? Lêkêtêk wê, nu seuri êta sirahna
71. Ari prêsidên nurutna ka saha ? Tukang cukur
72. Naon bêdana professor jeung monyêt ? Professor botak sirahna monyêt bujurna
73. Rancung lain landak, hêjo lain tentara ? Kaktus
74. Make baju lain manusa, make dudukuy lain tentara ? Bebegig sawah
75. Buah naon anu sok diwedak ? Kesemek
76. Ngahiung lain kapal, tulalêan lain gajah ? Suling
77. Dicekel gual-gêol, diteunggeul amburadul ? Ager
78. Bumi muter, sato disiksa, manusa jadi raja ? reungit
79. Naon sababna lamun urang turun tina angkot sok suku heula ? Lamun sirah heula bakal tikusruk
80. Bujurna ditiupan, awakna dicabakan ? Dêlman
81. Luarna naraka jerona surga ? Durên
82. 1000 lemesna naon ? Kulembu
83. Dicabak biê ditakol ngelentrung ? Tai kotok dina tihang listrik
84. Turun laun nanjak gancang ? Lêho
85. Diantep aya dibetot leungit ? Lêho
86. Candi naon anu gondrong ? Can dicukur
87. Naon bahasa Arabna masjid di tengah-tengah laut ? Mustahil
88. Naon bêdana onta jeung daun sampeu ? Onta di Arab saun sampeu diurab
89. Bahasa Cina na tukang nyolong ? Siang-siang maling sêng
90. Budak dugul kekecepekan ? Gayung
91. Mun tas nakol bedug sok naon ? Sok panakol
92. Sirah naon nu bisa leumpang ? Sirahmat
93. Sop naon nu bisa nembang teu bisa didahar ? Sopiah

Dina hiji waktu Kéan Santang ngadeuheus ka ramana, unjuk-kan yén dirina hayang ningali getih sorangan. Hayang tarung ngadu jajatén, tapi teu aya nu bisa nandingan.

Ngadangu kasauran putrana kitu, Prabu Siliwangi geuwat baé nyauran para ahli nujum karajaan. Ménta bongbolongan, sugan aya jalma anu bisa nandingan kasaktén Kéan Santang. Ditanya kitu, para ahli nujum téh kabéhanana ngabigeu teu aya nu némbal. Ngan teu lila ujug-ujug aya aki-aki anu nyampeurkeun ka Kanjeng Prabu.

“Kanjeng Prabu, kaula bisa nuduhkeun saha jalma anu bisa nandingan kasaktén tuang putra. Jauh pisan éta jalma téh, ayana di nagri Mekah, ngaranna Bagénda Ali.”
“Saha kira-kirana anu bakal unggul lamun anak kaula tarung jeung Bagénda Ali?” Kanjeng Prabu ,alik naor.
Anéh pisan, saméméh ngajawab éta aki-aki téh geus ngaleungit, duka ka mana ngilesna.

Ti harita Kéan Santang teu genah cicing. Hayang geura gok patepung jeung jalma nu ngaran Bagénda Ali. Hayang geura tarung ngadu jajatén.

Hiji waktu Kéan Santang pamitan ka ramana Prabu Siliwangi, seja miang ka nagri Mekah, rék nepungan Bagénda Ali. Sanggeus diwidian ku ramana, gejlig baé anjeunna angkat ti Pajajaran. Leumpang ngulon, muru ka lebah panonpoé surup. Bubuhan jalma sakti, leumpangna téh napak kancang, nyaéta leumpang dina kulit cai, nyéak gancang ka ditu ka kulonkeun.

Barang nepi ka nagri Mekah, Kéan Santang patepung jeung aki-aki anu keur ngiuhan handapeun tangkal korma. Pok Kéan Santang nanya.
“Ki, cing tuduhkeun di mana ayana Bagénda Ali téh?” Éta aki-aki téh ukur melong, neges-neges ka nu anyar datang.
“Saha Ujang téh?” pokna kalah malik nanya.
“Kaula téh Kéan Santang ti Pulo Jawa. Kaula hayang tepung jeung Bagénda Ali. Cenah anjeunna téh jalma sakti, kaula hayang ngadu jajatén.”
“Euh, kitu. Yu atuh tuturkuen Aki!” ceuk éta aki-aki ngajak indit ti dinya. Kéan Santang nuturkeun. Tapi kakara ogé sababaraha léngkah, aki-aki téh pok nyarita, “Aéh, iteuk Aki tinggaleun. Cing pangnyokotkeun, Ujang!” Kéan Santang geuwat balik deui, maksud rék mangnyokotkeun iteuk. Ari iteuk si aki téa nanceb deukeut tangkal korma.

Barang éta iteuk dicabut, karasa bet pageuh. Kéan Santang nyabut deui beuki bedas, angger baé teu kacabut. Kéan Santang mapatkeun ajian, nyabut deui éta iteuk sataker tanaga. Ané pisan. Lain iteuk anu kacabut téh, tapi kalah sukuna ambles kana taneuh. Kitu jeung kitu baé, unggal manéhna nyabut, sukuna kalah beuki mebes.

Kéan Santang geus ngoprot késang. Iteuk angger teu bisa kacabut. Manéhna mimiti boga curiga yén aki-aki nu boga éta iteuk téh tangtu lain jalma samanéa. Keur kitu, aki-aki téh geus aya gigireun.
“Saha saenyana andika téh, Ki?” ceuk Kéan Santang semu lungsé. Si Aki ukur seuri ditanya kitu téh.
“Nya kaula anu ditéangan ku andika téh. Kaula Bagénda Ali!” Ngadéngé kitu, rumpuyuk baé Kéan Santang nyuuh kana sampéan Bagénda Ali. Manéhna taluk, sadar yén kasaktén dirina ukur satungtung buuk upama dibandingkeun jeung élmu kawedukan Bagénda Ali.
“Kaula taluk, sumerah diri hoyong guguru ka Kanjeng Bagénda,” ceuk Kéan Santang.
“Heug, tapi andika kudu ngucapkeun sahadat heula, asup agama Islam,” walon Bagénda Ali

Ti harita Kéan Santang asup agama Islam sarta terus guguru, ngulik bagbagan agama Islam di Nagri Mekah.

Sanggeus ngarasa cukup ngalap élmu, Kéan Santang pamitan hayang mulang deui ka nagrina, Pajajaran. Ku Bagénda Ali diwidian kalayan dibéré pancén yén Kéan Santang kudu nyebarkeun agama Islam di Pulo Jawa. Aya dua rupa barang anu dibekelkeun ku Bagénda Ali nyaéta tasbéh jeung kitab Al-Qur’an.

Kéan Santang mulang deui ka Pajajaran, nyebarkeun agama Islam. Teu saeutik rahayat Pajajaran anu tuluy ngagem agama Islam. Ari ramana, Prabu Siliwangi, teu kersaeun ngagem agama Islam. Dibarengan ku sawatara prajuritna, Prabu Siliwangi ninggalkeun karaton, ngungsi ka hiji tempat di pakidulan Garut. Ceuk sakaol, di dinya anjeunna ‘ngahiyang’, ngaleungit tanpa wujud. Ari para prajuritna minda rupa jadi maung.

(dicutat tina buku Sabasa 7A (Revisi), Ahmad Hadi, Pamulang:Tangerang, 2004, kaca 40 – 42)

Hadirin hormateun sim kuring,
Alhamdulillah kalayan widi Alloh SWT, dina ieu waktos urang sadaya baris tiasa nyaksian lumangsungna akad tikah Wawang Fatimah binti Ahmad Tosin ka lr. Agus Permadi bin Kusnadi Harjapamekas. Ari pertikahan téh kalebet kana ibadah anu prak-prakanana parantos matok sakumaha anu dipidamel ku Rosululloh SAW. Salasawios hal anu kedah aya dina upacara pertikahan nyaéta hutbah. Tangtos sadayana ogé tos pada uninga hutbah nikah téh hususna ditujukeun ku calon pangantén cindekna ka Wawang jeung ka Agus, tapi deuih ari dina umumna mah ditujukeun ka sadayana; sanés waé ka pangantén baru, margi pangantén baru ogé kalebet sim kuring anu ayeuna sasanggem- masih kénéh peryogi ku naséhat. Da kitu geuning ari urusan rumah tangga mah, kolot ku kolotna, angger waé masih kénéh aya kakirang, tara mulus sareng bérés roes salalamina. Atuh komo deui anu nembé bade ngambah sagara rumah tangga, kawas Wawang jeung Agus ayeuna, peryogi pisan ku rupi-rupni naséhat kautamian.

Tah ku sabab éta pisan, Wawang, Agus, ayeuna Uwa rék namplokkeun kanyaah pikeun hidep duaan. Lain kanyaah anu mangrupa dunya brana, tapi kanyaah dina wujud naséhat anu sumberna tina saréat agama urang. Muga-muga waé ieu naséhat téh sing terus nyerep kana batin hidep duaan, sarta salilana jadi cecekelan enggoning hidep nyorang sagara rumah tangga, anu sakapeung ombakna rintih matak tingtrim, tapi deuih sakapeung sok ngagalura umpal-umpalan nepi ka lamun urang kurang tapis ngamudikeun reujeung ngawelahna mah éta parahu anu ditumpakan ku urang téh mungkin neumbag karang, atawa kerem ka dasar sagara.

Wawang Agus,
Ti mimiti poé ieu, lambaran hirup hidep téh bakal béda jeung mangsa ka tukang-tukang jaman masih kénéh lalagasan. Ti mimiti poé ieu, hidep geus kabeungkeut ku hiji aturana nu di jerona aya rupa-rupa kawajiban jeung hak. Ngahaja anu ditandeskeun ku Uwa téh kawajibanana, lain hakna. Ari sababna, nya kawajiban pisan anu pangheulana kudu disanghareupan téh, geus kitu kakara, hak nuturkeun. Lamun hak diheulakeun ari kawajiban dipandeurikeun engkéna sok timbul sikep aing-aingan jeung sili teumbleuhkeun antuk na rumah tangga moal bérés roés, lantaran bakal leubeut ku pacogrégan.

Sakeudeung deui, insya Alloh, hidep duaan bakal ikrar; saréatna ikrar di payuneun anu ayeuna haladir nyaraksian, hakékatna ikrar di payuneun Gusti Robbul izzati anu tara sulaya kanaj angji. Engké saba’dana akad tikah, Agus bakal meunang sesebutan salaki, ari Wawang bakal jadi pamajikan. Éta salaki jeung pamajikan téh bakal jadi “dwi-tunggal”. Mémang enya ari raga badagna mah dua, tapi éta anu dua téh dina ngawelahna parahu rumah tangga kudu ngahiji, teu meunang pakia-kia, nu hiji ngétan nu hiji ngulon. Naha kudu ka mana éta parahu téh dikamudikeunana? Taya liana, nu kudu jadi pangjugjugan hidep duaan téh mardotillah karidoan Alloh.

Ari salaki, Agus, sesebutanana téh kapala rumah tangga. Cindekna, hidep téh bakal jadi pamingpin. Ari anu kasebut pamingpin Rasululloh SAW parantos midawuh “Jaga di yaumil ahir, pamingpin téh bakal ditanya ngeunaana nu dipingpinna.” Ana kitu, mémang beurat jadi pamingpin téh, sabab kudu tanggung jawab kana sakur ucap, ketak, jeung laku lampah dina ngalaksanakeun kapamingpinannana, naha luyu jeung tetekon ti Alloh atawa henteu.

Tah, tina kalungguhan kapala rumah tangga pisan kawajiban Agus diwincikna téh. Kawajiban nu kahijin yaéta mingpin; anu paling deukeut nya mingpin pamajikan jeung mingpin anak lamun geus diparengkeun boga turunan. Anu kasebutna pamingpin rumah tangga, tangtu waé kudu bisa nyiptakeun katengtreman di jero rumah tanggana ieu katengtreman téh bakal ngawujud lamun si pamingpin di antarana mampuh nyumponan pangabutuh boh pangabutuh lahiriah boh pangabutuh batiniah. Pangabutuh lahiriah téh réa pisan rupana; malah geuning dina jaman ayeuna mah dibagi-bagi deui jadi pangabutuh primér, sekundér jeung saterusna. leu pangabutuh téh daék teu daék ku Agus kudu dicumponan ku jalan ngayakeun rupa-rupa tarékah anu teu méngpar tina hukum agama jeung hukum darigama. Naha ieu pangabutuh téh ukuranana tepi ka mana: hal éta mah rélatif, sabab mungguhing ari anu disebut cukup, saban jalma tangtu moal sarua watesna. Ngan tangtu waé lantaran urang mah panganut agama lslam, ukuran hirup the teu meunang kaleuleuwihi, sabab ari jalma kaleuleuwihi téh bakal aya dina bebendon Alloh SWT. Ari anu disebut pangabutuh batiniah, éta téh teu éléh penting batan pangabutuh lahiriah. Pangabutuh batiniah téh taya lian anu ngawengku aspék kajiwaan.L amun pangabutuh lahiriah dicumponanana ku hal-hal nu sipatna matéri, ari pangabutuh batiniah mah kudu dicumponan ku ajén-inajén bebeneran kaluhungan kaéndahan sumanget jeung motivasi gawé. Pikeun nyumponané ta pangabutuha, nu paling utama hidep kudu nyindekel kana tungtunan ajaran agama. Insya Alloh, rumah tangga hidep bakal bagja jeung salamet, boh dunya boh ahérat. Kapan pidawuh Robbul Alamin 0gé “Dhuribat ‘alaihimudz dzillatu aenama tsuqifu illa bihabli minallohi wahabli minannas.” Kahirupan maranéhna bakal dilimpudan ku kahina dimana waé ayana, kajaba lamun maranéhanana nyekel kana tali Alloh jeung tali hubungan papada manusa. Ari anu dimaksud ‘tali Alloh téh taya lian ajaran agama.

Kitu deui Wawang anu bakal jadi pamajikan, sarua pada-pada boga kawajiban.
Ari kawajibana nu paling deukeut dina kahirupan rumah tangga nyaéta kumawula ka salaki. Kadé, Wawang, ari kumawula ka salaki téh ulah dihartikeun ngalalaip atawa ngahinakeun diri. Lain kitu, kadé mungguh dina saréat lslam, kumawula ka salaki téh jadi bagian tina ibadah, hartina kaasup kana pagawéan nu bakal diganjar ku Alloh SWT. Dina kumawula téh di antarana aya unsur rasa hormat jeung ngajénan, satia ngabeberah dina ninggang keur meunang kasusah ngasongkeun pandangan jeung tinimbangan ngeunaan hiji pasualan anu keur disanghareupan jeung ngajaga kasaimbangan sangkan tetep aya dina suasana harmonis. Anu bieu ditatan ku Uwa téh kaasup kana kumawula dina urusan batiniah. Ari kumawula dina urusan lahiriah di antarana nyenangkeun salaki ku hal-hal atawa rupa-rupa pagawéan lahir; cindekna mah ti mimiti urusan dapur tepi ka urusan kasur.

Wawang jeung Agus,
Lamun hidep geus ngalaksanakeun kawajiab bieu, tangtu hak hidep bakal nuturkeun. Lamun Agus geus ngalaksanakeun kawajiban, hartina hak Wawang bakal kacumponan. Kitu deui lamun Wawang geus ngalaksanakeun kawajiban, tinangtu hak Agus bakal kacumponan.Hartina hak téh teu kudu dipénta, asal masing-masing hak geus nyaho jeung geus ngalaksanakeun kawajibanana.

Tadi ogé ku Uwa geus disabit-sabit yén lajuna rumah tangga téh teu salawasna lancar, sabab sok aya waé gangguanana. Mun rumah tangga hidep ngarandapan hal-hal anu matak teu genah, anggap waé éta téh hiji cocoba. Tah, dina nyanghareupan éta cocoba, hidep kudu sabar. Pirang-pirang ayat Alloha nu nétélakeun yén urang kudu sabar, sangkan meunang kabagjaan. Kapan kasauran Anjeunna ogé, “lnnallohamaashshobirin.” Saéstuna Gusti Alloh téh sasarengan jeung anu salabar.

Minangka pamungkas ieu hutbah nikah, Uwa rék nepikeun hiji pidawuh Rosululloh SAW anu mudah-mudahan waé bakal jadi hiji kareugreug pikeun hidep duaan enggoning nyorang rumah tangga. ‘Arba’un min saadatiml mar’i: antakuna zaujatuhu sholihatan, waauladuhu abroron wakhulathouhu sholihina wayakuna rizquhu fi baladihi.

Tina éta pidawuh Rosul, urang bakal terang yén opat hal anu bakal jadi koncina kabagjaan, nyaéta pamajikan anu soléh, barudak anu soléh, babaturana nu soléh, jeung sumber rejeki anu aya di nagri sorangan. Tina éta anu opat hal, tilu di antarana raket patalina jeung papada manusa, nyaéta pamajikan, anak, j eung babaturan. Ari anu hiji deui patali jeung sumber kahirupan. Jadi anu kudu soléh téh lain anak jeung pamajikan wungkul, tapi deuih babaturan. Dina hal ieu ngandung harti yén dina néangan babaturan téh urang kudu pipilih heula: téangan jelema anu soléh. Ari sumber rejeki, ceuk dina hadis anu bieu, kacida hadéna lamun aya di nagri sorangan. Kecap “nagri sorangan” di dieu bisa dihartikeun daérah atawa w ewengkon. Mémang pikahartieun lamun sumber rejeki urang ayana di daérah sorangan, lain di tempat anu jauh, tangtu bakal leuwih énténg. Da geus bisa kasawang atuh, lamun urang boga pagawéan di tempat anu jauh, geus tangtu bakal mindeng ninggalkeun rumah tangga. Lamun kurang-kurang na bisa mah, hal éta téh bisa jadi mamala, sabab urang jauh ti kulawarga. Tah kabeneran, Agus mah pan boga sumber kahirupan téh ayana di tempat sorangan. Jadi teu kudu jauh-jauh lumampah ninggalkeun imah.

Wawang, Agus,
Urang cukupkeun sakieu waé hutbah nikah ti Uwa, da ari anu penting mah lain lebah panjang atawa pondokna, tapi nyerepna kana ati sanubari hidep, terus dipolahkeun dina kahirupan sapopoé. Ngahaja ieu hutbah ku Uwa ditepikeunana maké basa anu basajan, ngarah babari kahartina. Uwa mah itung-itung mekelan hidep duaan anu rék nyorang lambaran hirup anyar. Tangtunaogé ari luang jeung pangalamana nu leuwih lega mah engké deui ogé ku hidep duaan bakal karandapan.

Minangka pamungkas hutbah, Uwa rék munajat ka Alloh SWT, muga-muga rumah tangga hidep téh sing bérés roés, sakumaha bérés roésna rumah tangga Kangjeng Nabi Muhammad SAW sareng Siti Hodijah, muga-muga hidep duaan dipaparin barudak anu soléh, rejeki anu barokah enggoning ngahontal mardotillah. Amin.

Wassalamu’alaikum warohmatullohi Wabarokatuh,

(Dicutat tina buku Biantara Basa Sunda, Drs. Tatang Sumarsono, Geger Sunten:Bandung, 2000, kaca 115 – 121)

Bismillahirrahmanirrohim,
Assalamu’alaikum warohmatullohi wabarokatuh
Langkung ti payun, mangga urang sami-sami nyanggakeun puji sinareng sukur ka Gusti Anu Maha Suci, réhna dina dinten ieu urang tiasa ngariung enggoning ngahadiran acara paturay tineung. Solawat sinareng salam mugia salawasna ngocor ka Kangjeng Nabi Muhammad SAW, ka kulawargina, ka sahabatna, katut ka muslimin sareng muslimat sadayana kalebet urang sadayana anu hadir dina ieu acara.

Hadirin anu sami-sami rawuh, utamina:
• Kepala Dinas Pendidikan dan Olah Raga atanapi anujanten wawakilna
• Ketua Yayasan Darma Setia Kosgoro miwah réngrénganana
• Bapa Kapala Sakola miwah Ibu sareng Bapa Guru SMA Kosgoro Kota Bogor
Anu ku sim kuring dipihormat.
Kitu oge ka sakumna siswa/siswi SMA Kosgoro anu ku sim kuring dipikacinta.
Dina ieu waktos, sim kuring dipercanten sasanggem minangka wawakil ti sakumna siswa/siswi kelas 12 anu moal lami deui badé ngantunkeun SMA Kosgoro Kota Bogor.

Sateuacan neraskeun nyanggem, simkuring seja nepangkeun, wasta…………………………….. kelas 12……
Hadirin hormateun simkuring, sarta dulur-dulur siswa/siswi SMA Kosgoro nu dipikacinta.

Teu karaos asa nembé kamari sim kuring jeung dulur sa entragan, anjog ka ieu sakola dina kaayaan anu suwung ku pangaweruh lara ku pangabisa tatapi aya dina paniatan anu kalintang luhung tur luhur ajenna, nyaéta nyuprih elmu nyiar pangabisa di ieu sakola, dina bimbingan tur atikan ti bapa miwah ibu guru kalawan ku kasabaran anu tan wates wangenna; Kiwari geus kudu miang ninggalkeun sakola, para guru salaku sepuh anu kalintang dipihormat, ogé adi-adi siswa/siswi SMA Kosgoro.

Aya kasedih nyangkaruk dina haté, anu jadi bangbaluh pédah ahirna kudu ninggalkeun anu kungsi jadi tempat-tempat dimana kuring saparakanca biasa idek liher. Kajadiaan-kajadian anu pikasediheun, pikabungaheun, pikalucueun, ogé pikasieuneun. Papisah jeung dulur-dulur, adi-adi kelas, ngantunkeun bapa miwah ibu guru anu salami ieu parantos ngawariskeun élmu pangaweruh ngawulang pangabisa ka sim kuring saparakanca. Éta téh bakal janten katineung sim kuring saparakanca

Tatapi aya kabungah anu badag kacida, moal aya kecap anu bisa ngawawakilan, duka kumaha kudu ngungkabkeunana, réhna antukna réngsé ogé nyuprih élmu nyiar pangabisa di ieu paguron.

Ayeuna sim kuring saparakanca kudu miang ti ieu sakola, sok sanaos teu sadaya laksana neraskeun sakola ka puguron luhur, tapi ari kawajiban milari élmu mah moal dimomorékeun. Mugia pangaweruh sareng atikan anu parantos di tenggerkeun dina dada sim kuring saparakanca ku bapa miwah ibu guru salami tilu taun tiasa janten tatapakan dina enggoning mayunan gapura kahirupan sareng ngudag cita-cita. Mugia bapa miwah ibu guru tiasa ngadungakeun, pamugi léngkah sim kuring saparakanca kanggo kapayunna sing tiasa lungsur-langsar sareng aya dina ridho Gusti Anu Maha Suci. Insya Alloh.

Hadirin hormateun simkuring
Dina kasempetan ieu sim kuring saparakanca ngahaturkeun sewu nuhun ka ibu rama ku kanyaahna parantos maparin kesempetan nyukcruk pangaweruh di ieu paguron. Ka Bapa miwah Ibu guru, salami sim kuring saparakanca nyuprih élmu jeung pangabisa, kalintang seueurna ucap lampah anu nguciwakeun sarta jadi bangbaluh kana manah bapa/ibu guru sarta sesepuh di ieu paguron. Pamugi Bapa miwah Ibu Guru luntur galih, kersa ngahapunten sim kuring saparakanca. Sawangsulna deuih, pami téa mah aya sakedik kalepatan Bapa miwah Ibu Guru, Insya Allah ku kaweningan tur kaihlas ku sim kuring saparakanca badé dilubarkeun.

Husus kanggo Almarhumah Ibu Kapala Sakola, Ibu Dra. Hj Tjahni Mariam, anu parantos ngantunkeun urang sadaya, sim kuring saparakanca sambung dunga mugia mantenna anu parantos mingpin ngajaring ieu paguron; masihan kanyaah, bingbingan, panuyun, panggeuing sareng tuladan ka urang sadaya tiasa ditampi Iman Islamna kalayan dipaparin tempat nu mulya kénging darajat anu satata sareng para Aulia anu dipikacinta ku Allah, amiin… amiin ya Robbal alamiin.

Pamungkas hayu urang sasarengan ngadu’a mugia urang sadaya tiasa lulus 100%. SMA Kosgoro Kota Bogor nu kalebet Sekolah Standar Nasional, nu majeng kana rintisan Sekolah Bertaraf Internasional, kalawan berangkat tina tatapakan Sekolah Berwawasan Kebangsaan dan Keunggulan Teknologi tiasa ngawujud jadi sakola pangpunjulna di Kota Bogor. Kalayan henteu nyapirakeun kabeungharan budaya bangsa sorangan.
Sakitu anu diseja kirang langkungna mugia tiasa ngahapunten
Pileuleuyan pileuleuyan…sapu nyéré pegat simpay,
Pileuleuyan pileuleuyan…paturay patepang deui…
Insyaallah…
Wassalam.

(diserat ku Herni2ngsih, guru SMA Kosgoro Kota Bogor, kanggo biantara dina paturaytineung 2008-2009)